28 мая ў Лескавічах прайшоў раённы турысцкі злёт школьнікаў, у якім за перамогу змагалася 9 каманд са школ раёна. Сёлета турзлёт прысвячаўся 80-годдзю вызвалення Беларусі.
– Стала добрай традыцыяй навучаль-ны год заканчваць турысцкім злётам. Ён заўсёды дорыць яркія і незабыўныя эмоцыі, – адзначыла на ўрачыстым адкрыцці начальнік аддзела па адукацыі райвыканкама Аксана Талстая. – Няхай ён стане яркім стартам летніх канікул.
Галоўная інтрыга сёлетняга турзлёту заключалася ў тым, ці зможа яго ў трэці раз запар выйграць каманда Кардонскай школы. Юныя кардонскія турысты яўна былі настроены абараніць свой чэмпіёнскі тытул, тым больш, што дзеці з задавальненнем наведваюць школьны гурток «Юны турыст». Тым не менш, забраць сабе тытул імкнуліся усе каманды – падрыхтоўка да злёту ў школах была сур’ёзная.
Турзлёт пачаўся з самага галоўнага выпрабавання – кантрольна-турысцкага маршруту. 2,5 кіламетра дыстанцыі даліся юным турыстам не зусім лёгка. Каб не нахапаць штрафных балаў, трэба было і правільна ўстанавіць палатку, пераадолець без хібаў павуцінне, гаць, бервяно і многае іншае. Лепшы вынік паказалі турысты Кардонскай СШ, дапоўнілі прызавую тройку каманды Амбросавіцкай і Мікіціхінскай школ. Як высветлілася пазней, менавіта гэтыя каманды былі ў лідарах на большасці этапаў і раздзялілі паміж сабой выніковыя прызавыя месцы.
Цікава прайшло спартыўнае арыентаванне. З дапамогай компаса неабходна было знайсці ўсе кантрольныя кропкі з літарамі і скласці слова «победитель». З гэтым заданнем лепш за ўсіх справіліся вучні Мікіціхінскай СШ. У тэхніцы веласіпеднага турызму перамаглі турысты Слабадской школы. У конкурсе баявых лісткоў прызавая тройка наступная: першае месца –Шумілінская СШ № 1, другое – Кардонская СШ, трэцяе – Шумілінская СШ № 2.
Конкурс краязнаўцаў «Старонкі гісторыя» складаўся з пытанняў, якія тычыліся 80-годдзя вызвалення Беларусі ад нямецка-фашысцкіх захопнікаў і стагоддзя ўтварэння Шумілінскага раёна. Тут лепшае веданне гістарычных фактаў паказалі вучні СШ № 1, крыху адсталі абальчане.
Як заўсёды, цікавымі і арыгінальнымі выдаліся візітныя карткі каманд, у якіх юныя турысты ў розных формах расказвалі пра сябе, сваю школу, свой родны край. Лепшым было прызнана выступленне Кардонскай СШ, другое месца – у Мікіціхінскай СШ, трэцяе месца падзялілі СШ № 1 і Мішневіцкая БШ.
Што атрымалася па выніках усіх этапаў і конкурсаў? Каманда Кардонскай СШ пераканаўча выйграла турзлёт. Дапоўнілі прызавую тройку каманды Мікіціхінскай СШ і Амбросвіцкая БШ.
Аляксандр ШЭДЗЬКО.
